Berlini firmos marrëveshjen me Pekinin – 24.9% e portit të Hamburgut i jepet kinezes “Cosco”

Qeveria gjermane e Olaf Scholz ka firmosur marrëveshjen për hyrjen e sipërmarrjes shtetërore kineze Cosco në portin e Hamburgut. Cosco ka blerë 24.9% të aksioneve të një prej katër terminaleve.

Konfirmimi vjen pas zërave të ditëve të fundit, dhe ka shkaktuar debate në Gjermani për ndikimin e mundshëm të Pekinit në infrastrukturat strategjike gjermane.

Një ditë më parë mediat gjermane publikuan marrëveshjen e arritur nga qeveria për një kuotë pjesëmarrjeje prej 24.9% për kompaninë shtetërore kineze Cosco në terminalin e Tollerort, një nga katër të portit të madh gjerman dhe një nga tre të grupit Hhla.

Bëhet fjalë për një kuotë më të vogël në krahasim me 35% për të cilën u fol në fillim, mes polemikave të forta dhe bllokadave të brendshme. Sipas konfirmimeve të fundit, dhe gjashtë ministritë e qeverisë Scholz fillimisht kundër bashkëpunimit Cosco – Hhla, tashmë e mbështesin marrëveshjen. Me më pak se 25% në fakt, grupi kinez nuk mund të ushtrojë formalisht një ndikim në menaxhimin e terminalit.

Ministri gjerman i ekonomisë, Robert Habeck, u shpreh se me shumë mundësi nuk do të ketë më investime të tjera kineze në sektorë kritikë të infrastrukturës, duke shtuar se debatet për marrëveshjen me Cosco-n po vazhdojnë ende.

Por kritikat vazhdojnë. Opozita gjermane akuzon qeverinë se nuk ka nxjerrë asnjë mësim nga varësia nga Rusia. Reagime të njëjta erdhën dhe nga të gjelbërit dhe liberalët e FDP-së, të dyja parti në qeveri me SPD-në e Scholz.

Në analizën për hyrjen e Cosco në Hamburg nuk shkruhet vetëm se rrezikohet një ndikim i fortë dhe domethënës i Kinës në operacionet në port dhe në transportin detar në Gjermani e Bashkimin Europian. Por pika kryesore është që në të kaluarën është vërtetuar se Cosco hyn shpesh në porte të reja si aksioner në minorancë, për të marrë më pas një kontroll më të madh deri në vonesën apo bllokimin total të vendimeve të rëndësishme.

Një nga promovuesit më të mëdhenj të hyrjes kineze në portin gjerman mbetet kryebashkiaku i Hamburgut, socialdemokrati Peter Tschentscher, një njeri shumë pranë kancelarit Scholz. Sipas tij, prishja e marrëveshjes do të ishte një disavantazh për Hamburgun në krahasim me Rotterdam-in dhe Anversën, ku Cosco ka kuota të terminaleve

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.