Biden, në mbrojtje të pasagjerëve të linjave ajrore – Dëmshpërblim në para’ për çdo vonesë, apo anulim fluturimi

Presidenti amerikan Joe Biden tha se administrata e tij po përgatit rregulla të reja që synojnë t’u kërkojnë kompanive ajrore të kompensojnë pasagjerët për vonesat ose anulimet e konsiderueshme të fluturimeve kur transportuesit janë përgjegjës.

Kjo është e fundit në një seri lëvizjesh nga administrata Biden për të goditur linjat ajrore dhe për të forcuar mbrojtjen e pasagjerëve për fluturimet e brendshme të SHBA-së dhe fluturimet ndërkombëtare që përfshijnë një destinacion ose origjinë amerikane. Biden tha se e kuptonte zhgënjimin ndaj linjave ajrore kombëtare dhe se “udhëtarët amerikanë meritojnë më mirë”.

Departamenti Amerikan i Transportit nuk specifikoi se sa para’ synon t’u kërkojë kompanive ajrore të paguajnë pasagjerët për vonesa të konsiderueshme. Por ai pyeti transportuesit vitin e kaluar nëse ata do të pranonin të paguanin të paktën 100 dollarë për vonesat prej të paktën tre orësh të shkaktuara nga linjat ajrore.

Megjithatë, mund të duhen vite për të shkruar dhe finalizuar rregullat dhe disa operatorë privatisht pyesin nëse departamenti ka autoritetin ligjor për të mandatuar kompensimin për vonesat. Një propozim i korrikut 2021 për t’u kërkuar linjave ajrore të rimbursojnë tarifat e konsumatorëve për bagazhet e vonuara, ose shërbimet në bord si Wi-Fi që nuk funksionojnë, ende nuk është finalizuar.

Departamenti i Transportit tha se planifikon të shkruajë rregullore që do të kërkojnë që linjat ajrore të mbulojnë shpenzime të tilla si ushqimi dhe hotelet nëse transportuesit janë përgjegjës për bllokimin e pasagjerëve. Shumica e transportuesve u angazhuan vullnetarisht gushtin e kaluar për të ofruar hotele ose ushqime, por nuk pranuan të japin kompensime në para për vonesat.

Departamenti amerikan i Transportit bëri të qartë se asnjë transportues amerikan nuk ka rënë dakord të sigurojë kompensim në para’ për fluturimet e vonuara, ose të anuluara nën kontrollin e transportuesve.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.