Bie çmimi, rritet importi i karburantit – 3-mujori/ Si ka ecur kafeja, birra dhe cigarja?

Rënia graduale e çmimit të karburanteve në muajt e fundit, është pasur me rritje të importeve nga kompanitë, por rrjedhimisht edhe të konsumit nga ana e qytetarëve. Referuar të dhënave zyrtare nga Drejtoria e Përgjithshme e Doganave, vihet re se nga muaji Janar dhe në vijim, sasia e importi të karburantit ka ardhur në rritje.  Konkretisht nga 40.7 mijë ton të importuara në Janar,  në muajin mars, shifra arriti në 46 mijë ton.

Sipas vendimi të fundit të Bordit të Transparencës, çmimi i naftës me pakicë tregtohet në nivelin 172 lekë/ litri dhe benzinës jo më shumë se 175 lekë/ litri. Nëse do të krahasojmë si 3-mujor me të njëjtë periudhë të viteve të mëparshme, importi i karburantit regjistron sasinë më të lartë në Janar-Mars 2023, ne afro 128.3 mijë ton të importuar.

Nga ana tjetër, nëse do ti referohemi edhe mallrave të tjerë të akcizës, me rritje të importit është regjistruar edhe birra, në afro 8 mijë ton si tremujor dhe shifra më e lartë krahasuar me të njëjtën periudhë të viteve të mëparshme.

Ndërsa importi i kafes ka pësuar një rënie të lehtë në 3 muajt e parë të vitit bë raport me vitin e kaluar por edhe me vitin 2021 , ku janë blerë nga jashtë rreth 1835 ton kafe, me një rënie prej 45 ton krahasuar me Janar Mars 2022.  Po ashtu krahasimisht me një vit më parë, rënie të lehtë ka shënuar edhe importi i cigareve. Në tre muaj janë blerë nga jashtë kufijve 670 ton cigare.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.