Biznesi ul varësinë nga jashtë, 80% e lëndëve brenda vendit – Kriza e tregjeve nxit kompanitë të kërkojnë në Shqipëri, kryeson ndërtimi

Kriza e çmimeve të mallrave gjatë vitit 2022, bashkë me kostot e rritura të transportit, i ka nxitur kompanitë shqiptare të hedhin sytë brenda vendit për të gjetur lëndë të para me çmime të pranueshme. Fenomeni u vërejt që në gjashtë mujorin e parë të vitit 2022. Sipas një vrojtimi të kryer nga banka e Shqipërisë për këtë periudhe, pjesa më e madhe e ndërmarrjeve, (respektivisht rreth 62% e ndërmarrjeve të vogla, 41% e atyre të mesme dhe 35% e atyre të mëdha) siguruan mbi 80% të lëndës së parë brenda vendit.

Krahasuar me periudhën paraardhëse, ky tregues është rritur me 3.2 pp në rastin e ndërmarrjeve të vogla, ndërkohë që është ulur 8.8 pp për ndërmarrjet e mesme dhe me 1.9 pp për ato të mëdha. Nga ana tjetër, rreth 39% e ndërmarrjeve të mëdha sigurojnë deri në 20% të lëndës së parë brenda vendit, me një rritje gjashtëmujore prej 2.5 pp.

Ndërkohë që një vrojtim i kryer këtë vit nga Banka e Shqipërisë zbardh se Tendenca për të kërkuar lëndë të para brenda vendit ka vijuar në rritje edhe në pjesën e dytë të vitit.

Sipas sondazhit, pjesa më e madhe e ndërmarrjeve të vogla e të mesme (rreth 55% e ndërmarrjeve të vogla dhe 39% e atyre të mesme) e sigurojnë mbi 80% të lëndës së parë brenda vendit. Gjithsesi, ky tregues ka rënë me 6.9 pp në rastin e ndërmarrjeve të vogla dhe me 1.7 pp për ndërmarrjet e mesme krahasuar me periudhën paraardhëse. Nga ana tjetër, rreth 41% e ndërmarrjeve të mëdha sigurojnë vetëm deri në 20% të lëndës së parë brenda vendit, me një rritje gjashtëmujore prej 3.4 pp.

Rezulton se sektori i ndërtimit vijon të mbetet me varësinë më të madhe ndaj lëndës së parë të siguruar në vend, ku rreth 62% e ndërmarrjeve të këtij sektori siguron mbi 80% të lëndës së parë brenda vendit. Gjithsesi, kjo peshë ka rënë me 6.8 pp krahasuar me gjashtëmujorin e kaluar dhe me 13.6 pp krahasuar me një vit më parë.

Nga ana tjetër, sektori i industrisë shfaq varësinë më të ulët, ku 52% e ndërmarrjeve të këtij sektori sigurojnë vetëm 20% të lëndës së parë brenda vendit. Pesha e këtyre ndërmarrjeve është rritur me 2.9 pp si në terma gjashtëmujorë ashtu edhe në ata vjetorë.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.