Bie “ritmi” i taksës së pasurisë – 8-mujori/ Bashkitë ulin arkëtimet me 1 miliardë lekë

Kryetarët e rinj të 61 bashkive në vend duket se ende nuk kanë ndezur siç duhet “motorët”, të paktën sa i takon mbledhjes së taksave dhe tarifave mujore. Të dhënat zyrtare për periudhën janar-gusht, tregojnë një rënie me 1 miliardë lekë të të ardhurave të pushtetit lokal. Konkretisht në 8 mujor 2023  bashkitë kanë arkëtuar rreth 19 miliardë lekë, ndërsa një vit më parë arkëtimet ishin në nivelin 20 miliardë. Rënie kanë pësuar të ardhurat si nga taksat lokale, që përbëjnë furnizuesin kryesor të buxheteve bashkiake, por edhe taksa e pasurisë.

Nga taksat lokale janë mbledhur rreth 14.8 miliardë lekë, apo rreth 500 milionë lekë më pak. Ndërsa nga taksa mbi ndërtesat janë arkëtuar rreth 4.2 miliardë lekë, me një rënie prej 400 milionë lekësh krahasuar me një vit më parë. Ndoshta në këtë zë ka ndikuar edhe hedhja për konsultim e projektligjit të ri për taksimin e ndërtesave, i cili ndoshta ka krijuar një farë stepje nga njësitë e qeverisjes vendore nëse duhet të vijojnë vjeljen me metodën aktuale apo duhet të presin ndryshimet përkatëse.

Rreth 5 vite nga reformimi i taksës së pronës (taksa e ndërtesës), problematikat e lidhura me të drejtat e pronësisë dhe mungesës së regjistrave kadastralë, ndër të tjera, rezultojnë të pengojnë shfrytëzimin e plotë të potencialit të kësaj takse.

Nga Janari i vitit 2026 parashikohet të hyjë në fuqi formula e re taksimit të banesave dhe tokave bujqësore për qytetarët shqiptarë, ku detyrimet do të paguhen në bazë të vlerës së tregut dhe reforma do të shtrihet në të  gjithë vendin.

Në projektligjin e hedhur për konsultim shpjegohet se për të gjithë njësitë e ndërtesave, që përfshihen në kategorinë e pronave rezidenciale, shkalla e taksës mund të variojë nga 0,1% deri në 0,2%, ndërsa për të gjithë njësitë e ndërtesave, që përfshihen në kategorinë e pronave bujqësore apo blegtorale, shkalla e taksës mund të variojë nga 0,15% deri në 0,25 %.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.