Bitcoin zbret poshtë 27 mijë dollarëve – Investitorët largohen nga asetet me risk, ndikon dhe IÇK në SHBA

Bitcoin ka humbur rreth 1% të vlerës në sesionin e kaluar duke zbritur poshtë 27 mijë dollarëve, ndërsa sot po qëndron në rritje të lehtë më rreth 0.3%. Në anën tjetër, ethereum ka shfaqur shenja të stabilizimit pranë 1500 dollarëve, pas disa sesionesh me radhë në rënie.

Që nga dita e hënë, tendenca e ethereum ka qenë në rënie për shkak se Fondacioni Ethereum shiti rreth 2.7 milionë dollarë në zotërime të kësaj kriptomonedhe. Indeksi i Tregut i CoinDesk, që është një tregues me bazë të gjerë i përbërë nga qindra kriptomonedha, ra me 0.4%.

Më herët gjatë kësaj jave, disa tregtarë deklaruan se prisnin që asetet me risk ku bën pjesë bitcoin dhe aksionet e teknologjisë, të kishin një tendencë në rënie pasi konflikti mes Izraelit dhe Hamasit u përkeqësua, duke nxitur investitorët të preferonin më shumë asetet e sigurta.

Ndërkohë, presioni mbi tregun e kriptomonedhave u shtua pas publikimit të Indeksit të Çmimeve Konsumatore në SHBA, që rezultoi në rritje me 0.4% me bazë mujore dhe me 3.7% me bazë vjetore. Analistët parashikonin një rritje me 0.3% dhe 3.6% respektivisht.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.