Bizneset ulin kredinë për kapital qarkullues – Kompanitë më pak hua për blerje inventari, pagesa furnitorësh, shlyerje taksash

Kredia për kapital qarkullues është një prej zërave të huamarrjes së bizneseve me rënie të dukshme gjatë muajve të parë të vitit 2023. Rënia është më e dukshme në segmentin e kredisë në lekë, ku rënia është në masën prej thujase 5% krahasuar me një vit më parë. Sipas të dhënave të sapopublikuara nga Banka e Shqipërisë, në muajin shkurt, totali i kredive të biznesit për kapital qarkullues ra në 36.5 miliardë lekë, nga 38,4 miliardë në të njëjtën periudhë të një viti më parë.

Tkurrja është më e lëhtë në kredinë në euro për kapital qarkullues, e cila u rrit thujase përgjatë gjithë vitit 2022, për të arritur kulmin në muajin shtator në vlerën totale prej 35.8 miliardë lekësh, thuajse 12% me e lartë nga sa ka rezultuar në shkurt të këtij viti.

Kredia për Kapital Qarkullues është kredi kryesisht për biznese të vogla me qëllimin për të financuar blerje inventari, pagesa furnitorësh, pagesa taksash shtetërore si dhe pagesa të tjera afatshkurtra ndaj të tretëve.

Ajo reflekton në masë të madhe trendet e kreditimit të biznesit veçanërisht gjatë fazës së fundit të vitit 2022. Ngadalësimi i kredisë për biznese për këtë periudhë reflektoi veccanërisht ecurinë e dobët të huasë për likuiditete.

Kushtet e përgjithshme në ofertën e kredisë për agjentët ekonomikë mbetën të shtrënguara në tremujorin e fundit të vitit 2022, trend që po vijon i ngjashëm edhe muajt e parë të 2023. Politikat e kreditimit në reflektuan kujdesin e shtuar të bankave përballë pasigurive mbi ecurinë ekonomike dhe mbi aftësinë paguese të kredimarrësve në të ardhmen.

Standardet e kreditimit u shtrënguan për të gjitha kreditë e reja akorduar bizneseve e individëve në tremujorin e fundit. Përqasja më konservatore e bankave në kreditim u shpreh edhe në rritjen e shkallës së kredive të refuzuara për të gjithë agjentët.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.