Bonot dhe obligacionet/ 22 ankande në prill, maj e qershor – Si mund të investojnë qytetarët në titujt qeveritarë

Në 3 muajt e ardhshëm, prill, maj dhe qershor, është planifikuar realizimi i 22 ankande bonosh dhe obligacionesh. Referuar kalendarit të emetimit të bonove, në muajin prill janë parashikuar 7 ankande me një vlerë të përgjithshme 36 miliardë lekë. Veç bonove të thesarit 3 dhe 12 mujore, në muajin prill është parashikuar emetimi i një obligacioni të ri 2 vjeçar dhe rihapje obligacionesh 3,10 dhe 5 vjeçare.

Në muajin maj janë parashikuar të  emetohen 8 ankande ku veç bonove dhe rihapjes së obligacioneve, është parashikuar edhe një emetim i ri obligacioni 7 vjeçar. Vlera totale e emetimeve të majit është 39.5 miliardë lekë.

Ndërsa në muajin qershor janë parashikuar 7 ankande me një vlerë totale 30 miliardë lekë.

Gjatë këtij viti është parashikuar që borxhi publik do të merret në masën më të madhe në tregun e brendshëm, në formën e bonove të thesarit e obligacioneve. Referuar planit vjetor të huamarrjes, totali i emetimeve të këtij viti pritet të jetë rreth 378.64 miliardë lekë.

Investimi në tituj qeveritar konsiderohet si investimi më i sigurtë në vend.

Individët mund të marrin pjesë në ankandet e bonove të thesarit  nëpërmjet sporteleve të Bankës së Shqipërisë në Tiranë dhe degët e saj në qytetet Shkodër, Elbasan, Lushnje, Korçë dhe Gjirokastër ose nëpërmjet subjekteve të licencuara nga autoritetet përkatëse për këtë shërbim.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.