Detyrim i ri për restorantet dhe marketet në Shqipëri – Duhet të lidhin kontrata për mbetjet, gjoba marramendëse për shkelësit e ligjit

Restorantet dhe mensat të cilat prodhojnë ushqim për konsum direkt për njerëz janë të detyruar të lidhin një kontratë bashkëpunimi me një operator të licencuar për grumbullimin, përpunimin ose eliminimin e nënprodukteve me origjinë shtazore kur ato nuk depozitohen si mbetje. Të njëjtin detyrim do të kenë edhe supermarketet apo njësitë e tregtimit që heqin nga tregu ushqime të cilat nuk mund të përdoren për njerëz kur ato dëmtohen, prishen, skadojnë apo nuk shiten.

Projektligji i ri i hedhur për konsultim nga Ministria e Bujqësisë për “Nënproduktet me orgjinë shtazore”, vendos detyrim gjithashtu edhe për  operatorët e biznesit të licencuar për mbarështimin e kafshëve, therjen e kafshëve, mbarështimin e peshkut, përpunimin e peshkut, etj që të lidhin një kontratë me një grumbullues të nënprodukteve me origjinë shtazore, impiant ose stabiliment të licencuar për përpunimin ose/dhe eliminimin e nënprodukteve me origjinë shtazore.

Sipas draftit, lidhja e kontratës është kusht i licencimit të aktivitetit primar. Mos pajisja me kontratë për këto operatorë biznesit brenda 18 muajve nga data e hyrjes në fuqi të këtij ligji përbën shkak për heqjen e menjëhershme të licencës për ushtrimit e aktivitetit primar.

Referuar projektligjit, këto masa do të ndikojnë  në mbrojtjen e mjedisit pasi nënproduktet janë potencialisht me ndikim negativ në ndotjen e tij nëse nuk mblidhen, përpunohen dhe shpërndahen siç duhet.

Drafti përcakton gjithashtu  masa shtrënguese ndaj shkelësve të ligjit, me dënime administrative, ndërkohë që shkeljet që përbëjnë vepër penale dënohen sipas Kodit Penal në Republikën e Shqipërisë.  Në dokument përcaktohet parimi “ndotësi paguan”, pra, dëmet që kanë vlerë financiare, ndaj çdo subjekti, shtetëror ose privat, paguhet nga individi ose subjekti që e shkakton.

Dënimet administrative variojnë nga 10 mijë deri në 2 milionë lekë gjobë në varësi të shkeljes që kryejnë operatorët, si në tregtim, licencim,  import apo eksport.

Projektligji synohet të miratohet në vitin 2024 por parashikohet të shtrijë efektet nga data 1 shkurt 2026, në raport me hyrjen në fuqi të ligjeve të tjera në proces përafrimi që ndërlidhen me të, të cilat po ashtu synohet të miratohen gjatë vitit 2024.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.