“Boom” i përdorimit të kriptove në Turqi – Vendi përgatit rregulla të reja për licencimin dhe taksimin

Masat e reja të Turqisë për të rregulluar tregun e kriptove do të përqendrohen në licencimin dhe taksimin, pasi vendi i katërt më i madh në botë i tregtimit të kriptove kërkon të dalë nga ‘lista gri’ e mbikëqyrësit ndërkombëtar të krimit financiar.

Ankaraja premtoi rregulloret e reja muajin e kaluar mes një ‘boom-i’ të gjatë në tregtimin e kriptove, pasi inflacioni në rritje dhe një rënia e lirës vendase nxiti një kërkesë për aktive alternative.

Turqia po kërkon gjithashtu të adresojë shqetësimet e ngritura nga mbikëqyrësi financiar me bazë në Paris, Task Forca e Veprimit Financiar – FATF, e cila e vendosi vendin në të ashtuquajturën listën gri të vendeve në rrezik të pastrimit të parave dhe krimeve të tjera financiare në vitin 2021.

Ekspertët e sektorit të kriptos në vend shprehen se futja e disa standardeve të licencimit do të jetë një nga prioritetet kryesore në rregulloren e re, pasi kjo do të parandalojë abuzimet ndaj sistemit.

Rregulloret mund të përfshijnë gjithashtu kërkesat e mjaftueshmërisë së kapitalit, masat për të përmirësuar sigurinë dixhitale, shërbimet e kujdestarisë dhe vërtetimin e rezervave.

Turqia renditet e katërta globalisht në vëllimet e transaksioneve të kriptove të papërpunuara, me rreth 170 miliardë dollarë gjatë vitit të kaluar, pas Shteteve të Bashkuara të Amerikës, Indisë dhe Mbretërisë së Bashkuar.

Vendi ishte i 12-ti në indeksin e adoptimit të kriptove të firmës, duke reflektuar dëshirën e turqve për të kundërshtuar zhvlerësimin e monedhës dhe interesin e të rinjve për teknologjinë e re.

Në tetor, ministri i Financave Mehmet Simsek tha se Ankaraja do të miratojë një legjislacion të ri që mbulon kripto-asetet sa më shpejt të jetë e mundur për të përmbushur rekomandimin e fundit të mbetur të FATF, i cili do t’i lejojë Turqisë të dalë nga lista gri, gjë që mund të ndikojë në vlerësimet e investimeve të një vendi dhe reputacionin.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.