Borxhi i SHBA kalon 31 trilionë dollarë! – Zyra e Buxhetit të Kongresit: Ekziston rreziku i minimit të besimit të investitorëve

Borxhi i SHBA kaloi 31 trilionë dollarë për herë të parë në historinë e saj dhe është një momenti tepër I vështirë, në një kohë kur situata fiskale e vendit duket se po përkeqësohet në terma afatgjatë, ndërsa në të njëjtën kohë po rritet kostoja e huamarrjes dhe bashkë me të edhe kosto e shërbimit të borxhit.

Sipas “New York Times”, nivelet rekord të huamarrjes së SHBA ishin konsideruar të qëndrueshme dhe të menaxhueshme nga shumë politikëbërës amerikanë kur vendi duhej të financonte masat kundër recesionit pandemik. Por tani, me Rezervën Federale që rrit vazhdimisht kostot e huamarrjes për të frenuar inflacionin në rritje, normat e larta të interesit po e bëjnë borxhin shumë më të kushtueshëm.

Sipas vlerësimeve të Fondacionit Peter G. Peterson, normat e larta të interesit sot mund të shtojnë edhe 1 trilion dollarë në shumën që qeveria federale do të paguajë për borxhin e saj. Kjo shumë do t’i shtohet edhe kostos tashmë marramendëse të shërbimit të borxhit, e cila arrin në 8.1 trilionë dollarë, sipas vlerësimeve të Zyrës së Buxhetit të Kongresit Amerikan.

Zyra e Buxhetit madje vlerëson se nëse normat e interesit për borxhin kombëtar rriten mjaftueshëm për të tejkaluar me një pikë përqindje nivelin e normave të interesit në bazë të të cilave ajo bën llogaritjet e saj, atëherë shpenzimet e Uashingtonit për interesin e borxhit mund të tejkalojnë në vitin 2029 shpenzimet e mbrojtjes të vendit.

Fed i kishte ulur normat e interesit në nivele gati zero gjatë valëve të para të pandemisë, por i ka rritur ato në mënyrë të qëndrueshme gjatë gjithë vitit. Tani normat e interesit të dollarit variojnë nga 3% në 3.25% dhe sipas vlerësimeve të fundit të bankës qendrore, ato pritet të arrijnë në 4.6% deri në fund të vitit.

Zyra e Buxhetit ka paralajmëruar për rreziqet që sjell borxhi në rritje dhe ka vënë në dukje se ekziston rreziku i minimit të besimit të investitorëve në aftësinë e qeverisë amerikane për të shlyer borxhin e saj. Sipas raportit, ky lloj shqetësimi mund të “çojë normat e interesit në një rritje të mprehtë dhe inflacionin në një përshpejtim të pakontrollueshëm”. Dhe ndërkohë, borxhi rritet mbi 31 trilionë dollarë që është një problem për presidentin Biden, i cili kishte premtuar se do të arrinte një lloj konsolidimi fiskal të vendit dhe do të reduktonte deficitin buxhetor me 1 trilion dollarë në një periudhë 10-vjeçare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.