Bosnja ndihmon perëndimin të shkëputet nga Kina – Miniera e argjendit, një nga projektet më të mëdha në Europë

Projekti Vareš i kompanisë “Adriatic Metals” në Bosnje dhe Hercegovinë, që është i listuar në bursën e Londrës, do të jetë një nga vendet e pakta të mëdha në kontinentin europian ku do të zhvillohen metalet kyçe të revolucionit të gjelbër.

Projekti mori mbështetje në terren, sepse ndihmoi në forcimin e ekonomisë lokale. Kjo mbështetet nga fakti se ky projekt kohët e fundit mori statusin e një “projekti të një rëndësie të veçantë” për Bosnje-Hercegovinën, gjë që tregon rëndësinë e këtij operacioni për sa i përket kontributit të tij ekonomik prej 25 për qind të totalit të investimeve të huaja direkte në Ballkan. Pritshmëria është që falë projektit Vareš, viti 2024 do të jetë i pari që nga pavarësia në 1991 që Bosnja dhe Hercegovina do të shënojë një suficit tregtar, pra do të ketë eksporte më të larta se importe.

Investitorët, politikanët dhe prodhuesit ndërkombëtarë janë në favor të tij, sepse një projekt i tillë do të lehtësonte aksesin në Europë në materialet e nevojshme për revolucionin e gjelbër, në të cilin argjendi, përçueshmëria e të cilit e bën atë ideal për t’u përdorur në turbinat e erës, dhe metale të tjera tradicionale si bakri do të jenë kyçe. Në vitin 2040, bota pritet të ketë nevojë për katër herë më shumë nga këto metale kritike për teknologjitë e gjelbra sesa sot, për t’u afruar edhe me përmbushjen e objektivave të emetimeve zero të dioksidit të karbonit.

Kreu i Njësisë për Lëndët e Para Kritike të Komisionit Europian, theksoi se “tranzicioni i gjelbër dhe dixhital do të rrisë shumë nevojën për këto materiale” dhe “ekonomitë e së ardhmes nuk do të mbështeten më mbi naftën dhe qymyrin, por mbi litiumin, silicin dhe elementët e mineraleve”.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.