BQE: Rritja ekonomike e eurozonës do të mbetet e dobët në afatin e afërt!

Zona e euros nuk duhet të lehtësojë tamponët e bankave, BQE thotë se rritja ekonomike e eurozonës do të mbetet e dobët në afatin e afërt pasi shërbimet dhe tregu i punës po vijojnë të dobësohen, por kombet në bllok nuk duhet të lirojnë rezerva bankare diskrecionale për të lehtësuar dhimbjen, tha Zëvendëspresidenti i Bankës Qendrore Europiane Luis de Guindos.

Disa nga vendet më të mëdha të eurozonës kanë zbatuar të ashtuquajturin tampon kundërciklik, i cili i detyron huadhënësit të lënë mënjanë më shumë kapital gjatë periudhave më të mira, të cilat më pas mund të lirohen kur të kthehet cikli ekonomik.

“Autoritetet makroprudenciale duhet të ruajnë rezervat e kapitalit të çlirueshëm për të siguruar që ato të jenë të disponueshme në rast se kushtet në sektorin bankar përkeqësohen,” tha de Guindos në një fjalim të hënën.

Gjermania dhe Franca të dyja zbatuan tampon të tillë këtë vit dhe Franca planifikon ta rrisë atë nga fillimi i vitit të ardhshëm, ndërsa Holanda njoftoi planet për të dyfishuar tamponin majin e ardhshëm.

Një shqetësim i mundshëm është se ekonomia e eurozonës ka qenë gjerësisht në stagnim gjatë gjithë vitit dhe çdo rikuperim vitin e ardhshëm do të jetë i cekët, duke e mbajtur rritjen nën 1%.

“Aktiviteti industrial më i dobët po përhapet tek shërbimet,” tha de Guindos. “Ka të ngjarë që ekonomia e eurozonës të mbetet e ndrydhur në një afat të afërt.”

Edhe tregu i punës, pika e ndritur në ekonominë e bllokut, ka filluar të tregojë shenja dobësimi, shtoi de Guindos.

Dhimbja ekonomike vjen pasi BQE ngriti normat e interesit në një nivel të lartë rekord nëpërmjet 10 rritjeve të njëpasnjëshme, duke shpresuar të ngadalësojë kërkesën e konsumatorit dhe të shtyjë inflacionin përsëri në objektivin e tij prej 2%.

Ndërsa inflacioni tani është nën 3%, de Guindos tha se ka të ngjarë të kërcejë përsëri më lart në muajt e ardhshëm, edhe nëse tendenca e përgjithshme disinflacioniste do të vazhdojë ende në afat të mesëm.

Për perspektivat për normat e interesit, de Guindos tha se BQE do të kishte më shumë informacion në dhjetor “për të rivlerësuar perspektivën e inflacionit dhe veprimet e nevojshme të politikës”.

Ai përsëriti gjithashtu udhëzimin standard të bankës se normat e interesit të mbajtura në nivelin aktual “për një kohëzgjatje mjaft të gjatë” do të luajnë një rol “të rëndësishëm” në uljen e inflacionit.

Edel Strazimiri  / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.