Shqipëria, progres në luftën kundër pastrimit të parave – Publikohet “Indeksi i Bazelit 2023”. Renditemi në vendin e 93-të
Shqipëria shënon progres në luftën kundër korrupsionit dhe pastrimit të parave. Indeksi i Bazelit për vitin 2023 e ka renditur Shqipërinë në vendin e 93-të me një vlerësim 4.75.
Raporti periodik i Institutit të Baselit, paraqet vlerësimin nga zero për ato me risk minimal apo të ulët, deri në 10 për ato me rrezik të lartë apo maksimal. Në rastin e Shqipërisë dhe vendeve që janë grupuar po ashtu në zonën portokalli shqetësim është korrupsioni e ryshfeti si edhe risqet politike e ligjore.
Nisur nga të dhënat, prej 2012 kur ka nisur edhe vlerësimi dhe deri më tani, indeksi ka pësuar rënie. Kështu, në 10 vitet e fundit, vlerësimi është luhatur nga 5 deri në 6, niveli më i lartë ky i arritur në 2019.
Ndërkohë që dy vitet e fundit ka një rënie nën pragun 5. Me rëndësi ishte vendimi i marrë nga Taskë Forca për Veprim Financiar (FAFT), në fillim të këtij muaji, e cili hoqi Shqipërinë nga lista gri, apo lista e vendeve me risk të lartë për pastrimin e parave.
Vendi qendroi prej më shumë se dy vitesh nën monitorim, për shkak edhe të prezantimit të nismës së amnistisë fiskale dhe penale. Në raportin e Task Forcës për Veprim Financiar, rekomandohet që të rishkruhet drafti me asistencën e ekspertëve të Komisionit Evropian.
Por cila është situata në raport me vendet e rajonit? Greqia është konsideruar me risk minimal, duke u rënditur në vendin e 136, ndërsa Serbia është pozicionuar e 97-ta, 4 vende mbi Shqipërinë. Indeksi vjetor, bazohet mbi 4 tregues, siç është transparenca dhe standardet financiare, korrupsioni e ryshfeti, rreziqet juridike dhe politike dhe përgjegjshmëria publike.
Ada Hazizolli/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.