“Inovacion në ndërtim dhe turizëm” – Nis Java e Sipërmarrjes, Ibrahimaj: Zgjidhje për sfidat që na presin

Sipërmarrës, biznese të vogla, të rinj dhe politikbërës do të kenë një javë intensive diskutimesh se si mund të përdorin inovacionin në funksion të gjenerimit të ideve të reja të biznesit si dhe zhvillimin e atyre ekzistuese.

Java Ndërkombëtare e Sipërmarrjes do të zhvillohet në datat 13-19 nëntor 2023 përmes organizimit të mbi 60 aktiviteteve në katër qytete të Shqipërisë, Tiranë, Korçë, Shkodër dhe Vlorë. Ministrja e Shtetit për Sipërmarrjen dhe Klimën e Biznesit, Delina Ibrahimaj, e pranishme në eventin hapës, theksoi se synimi është që sektorë të rëndësishëm të ekonomisë, si ndërtimi, turizmi, etj, të mund të zhvillohen përmes inovacionit.

“Shqipëria sot ka një zhvillim të madh, një bum të madh të sektorit të ndërtimit, i cili ka nevojë që të ketë një drejtim ku ndërtesat të jenë sa më inteligjente, ku qytete të jenë sa më të gjelbra, pra dhe ndërtimet të kenë vizionin e gjelbër. Tregjet ndërkombëtare do të paraqesin dhe një sfidë të madhe në rrugën tonë drejt integrimit europian, pasi shumë nga bizneset shqiptare do t’i përballin me një sfidë të madhe që është konkurrenca “e egër”. Pra, të gjithë ato kompani të cilat nuk janë përballur ende me tregjet ndërkombëtare do të duhet të rrisin produktivitetin e tyre, do të duhet të inovohen, me qëllim që të hyjnë të barabarta në këto tregje. Po ashtu, edhe sa e sa sfida të tjera në sektorë të ndryshëm, si sektori i turizmit. Vitet e fundit ne kemi pasur bum në numrin e turistëve, por zhvillimi i turizmit dhe zhvillimi i shërbimeve cilësore kërkon modernizim, kërkon automatizim, kërkon burime njerëzore të kualifikuara”.

Sipas saj, qëllimi është që të krijohet një fokus rajonal për zhvillimin ekonomik të vendit.

“Ne synojmë që të kemi një fokus rajonal në zhvillimin ekonomik, ne synojmë që të kemi një fokus gjinor në zhvillimin ekonomik, ne synojmë që të angazhojmë të rinjtë sa më shumë të jetë e mundur të zhvillimin ekonomik dhe kjo është arsyeja pse dhe eventet, por edhe Java, por dhe strategjia e sipërmarrjes me të cilën ne po punojmë, tashmë do të ketë të gjithë këto komponentë pasi vetëm duke shfrytëzuar të gjitha burimet që ne kemi mund të arrijmë të marrim maksimalisht atë që e ardhmja na ka rezervuar”.

Sipas Ibrahimaj, në fund të kësaj jave intensive synohet që të evidentohen problematikat dhe në mbështetje të tyre të hartohen politika të posaçme që synojnë ti shërbejnë zhvillimit ekonomik.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.