Brukseli nis veprime ligjore kundër platformës së mediave sociale X për përmbajtje të paligjshme!

Komisioni Europian ka nisur një veprim ligjor kundër platformës së mediave sociale X, e njohur më parë si Twitter, sipas rregullave të tij historike për platformat online, Aktit të Shërbimeve Dixhitale (DSA).

Ekzekutivi tha të hënën se do të hetonte nëse X mund të ketë shkelur DSA “në fusha të lidhura me menaxhimin e rrezikut, moderimin e përmbajtjes, modelet e errëta, transparencën e reklamave dhe aksesin e të dhënave për studiuesit”.

Kjo vjen pas një kërkese për informacion të dërguar nga Komisioni te X në tetor pasi mori indikacione se platforma po përhapte përmbajtje dhe dezinformata të paligjshme, veçanërisht përmbajtje terroriste dhe të dhunshme në kontekstin e sulmit të Hamasit në Izrael.

Që nga gushti 2023, X i është nënshtruar rregullave të reja të BE-së që e detyrojnë platformën të zbusë rreziqet që lidhen me shpërndarjen e përmbajtjes së paligjshme, dezinformimin dhe dhunën.

Është hera e parë që blloku europian nis procedura të tilla nën DSA.

“Dëshmitë që kemi aktualisht janë të mjaftueshme për të hapur zyrtarisht një procedim kundër X,” tha Margrethe Vestager, Zëvendës-Presidente Ekzekutive e Komisionit.

“Komisioni do të hetojë me kujdes pajtueshmërinë e X me DSA, për të siguruar që qytetarët europianë të mbrohen në internet – siç urdhëron rregullorja.”

​Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.