BSH ndërhyn më pak në tregun e parasë – Në tremujorin e parë injektimi mesatar ditor me maturim 1-13 javë ra në 34,89 mld lekë

Në tremujorin e parë të vitit 2023, ndërhyrjet e Bankës së Shqipërisë në tregun e parasë konsistuan në operacionet e tregut të hapur për injektim likuiditeti. Injektimi mesatar ditor nëpërmjet operacioneve me maturim 1-13 javë ka rënë në 34.89 miliardë lekë, kundrejt mesatarisht 44.60 miliardë lekë në tremujorin e mëparshëm dhe mesatarisht 40.76 miliardë lekë gjatë vitit 2022. Pas kësaj rënieje, mungesa është rikthyer rreth vlerave mesatare të 5 viteve të fundit, por tendenca në fund të tremujorit ka qenë për rritje të saj, kryesisht për shkak të akumulimit të lartë të likuiditetit në llogarinë e qeverisë dhe uljen e marrëveshjeve SWAP me Bankën e Shqipërisë.

Një transaksion SWAP është konvertimi i një monedhe me një tjetër monedhë në një moment të caktuar kohe, me një marrëveshje për të rikonvertuar atë përsëri në monedhën origjinale në një kohë të caktuar në të ardhmen. Normat e të dy shkëmbimeve vendosen paraprakisht.

Mungesa e likuiditetit, e shprehur sipas operacioneve injektuese të Bankës së Shqipërisë, ka qenë mjaft e lartë në 51.05 miliardë lekë në ditët e para të vitit, por me rritjen e shpenzimeve të Ministrisë së Financave, ka rënë në mes të muajit janar në 27.94 miliardë lekë, kur u shënua edhe vlera më e ulët. Shpenzimet e rritura të Ministrisë së Financave u financuan nga likuiditeti i akumuluar gjatë vitit 2022, rritja e marrëveshjeve SWAP në ditët e fundit të vitit 2022 dhe shitja e 50 milionë Eurove ndaj Bankës së Shqipërisë për shumën 5.74 miliardë lekë në muajin janar.

Sistemi bankar ka përdorur instrumentin e depozitës në Bankën e Shqipëreisë në mënyrë të vazhdueshme për mesatarisht 15.06 miliardë lekë prej mesatarisht 10.04 miliardë lekë në gjashtë muajt e mëparshëm. Instrumenti i kredisë njëditore është përdorur në 20 raste për mesatarisht 2.1 miliardë lekë.

Gjatë 3-mujorit të parë të vitit 2023, Banka e Shqipërisë ka zhvilluar 2 ankande për blerjen e valutës. Ndërkohë, gjatë këtij viti, me objektiv rritjen e rezervës valutore, Banka Qendrore synon të blejë përmes ankandeve 160-220 milionë Euro.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.