Bumi i pagesave elektronike, 450 milionë dollarë në një vit – 10.2 milionë transferta në total për pagesat e faturave, gjobave apo detyrimeve

Numri i pagesave me para elektronike ka shënuar një rritje të konsiderueshme si në numër dhe në vlerë gjatë vitit 2022, duke arritur në një total prej afro 450 milionë dollarë. Sipas të dhënave zyrtare të Bankës së Shqipërisë, numri i pagesave është rritur me 50% krahasuar me një vit më parë, ndërsa vlera e tyre me 190%.

E megjithastë, edhe pse numri i transaksioneve të pagesave me para elektronike ka arritur 30.3% të totalit të gjithë pagesave që kalojnë nga sistemi bankar, në vlerë, pagesat e kryera nëpërmjet këtij instrumenti nga institucionet e parasë elektronike mbeten në nivele mjaft të ulëta, ose më pak se 0.8% e gjithë vlerës së pagesave të kryera në total.

Përgjatë vitit 2022, në tregun shqiptar kanë operuar 9 institucione të parasë elektronike, nga 7 të tilla në fund të vitit 2021. Rritja e numrit të institucioneve të parasë elektronike ka ardhur edhe si efekt i miratimit të ligjit “Për shërbimet e pagesave”. Shtimi i institucioneve të parasë elektronike ka sjellë edhe një shtrirje më të gjerë të terminaleve që ato vënë në dispozicion të klientëve të tyre (si atyre fizikë dhe virtualë), konkretisht me një rritje të konsiderueshme prej 123.3% krahasuar me fundin e vitit 2021.

Përdorimi i parasë elektronike sjell lehtësira kryesisht për atë pjesë të popullsisë shqiptare që nuk zotëron një llogari bankare. Avantazhet për këtë pjesë të popullsisë konsistojnë në rritjen e fleksibilitetit për kryerjen e pagesave, duke llogaritur shtrirjen e gjerë të këtyre institucioneve në vend, por edhe në një kosto më të ulët për pagesat e kryera, sidomos për pagesat e gjobave, faturave utilitare mujore etj.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.