Bursat e nisin javën në qëndrueshmëri – Investitorët, të fokusuar te vendimi i OPEC+ për të ulur prodhimin

Tregjet europiane janë hapur me ndryshime të vogla në sesionin e sotëm, me investitorët që janë të fokusuar te OPEC+, pas vendimit surprizë për të ulur prodhimin me 1.16 milionë fuçi në ditë. Indeksi pan-Europian STOXX 600 e ka nisur ditën, në rënie të lehtë me 0.2%, ndërsa shumica e sektorëve po ndryshojnë minimalisht.

Sektori i naftës dhe gazit realizon fitimet më të mëdha, në rritje me rreth 4%.

Vendimi i OPEC+ ishte i papritur për tregjet dhe një lajm aspak i mirë, që mund të krijojë më shumë probleme për bankat qëndrore, në një kohë që po përballen me inflacionin e lartë.

Analistët vlerësojnë se ulja e prodhimit mund të shkaktojë një rritje të çmimeve të naftës deri në 20%, dhe Brenti i Londrës shumë shpejt mund të ngjitet deri në 100 dollarë për fuçi. Investitorët po presin edhe të dhënat mbi shitjet e automjeteve për Spanjën dhe Mbretërinë e Bashkuar, që do të publikohen më vonë gjatë ditës së sotme.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.