Bursat europiane zgjerojnë humbjet – Në fokus situata politike në Britani, Truss në presion për të dhënë dorëheqjen

Bursat europiane janë hapur në rënie edhe në sesionin e sotëm, për shkak të paqartësive ekonomike që po shoqërojnë tregjet. Indeksi pan-Europian Stoxx 600 e ka nisur ditën në rënie me 0.3%, ndërsa shumica e sektorëve janë në rënie. Investitorët janë të shqetësuar për inflacionin e lartë, pasi një ditë më parë të dhënat në Mbretërinë e Bashkuar treguan se çmimet u rritën me 10.1% me bazë vjetore, gjatë muajit të kaluar, duke shtuar frikën për recesion.

Edhe tregjet në rajonin e Azi-Paqësorit dhe Wall Street u mbyllën në rënie. Në fokus të tregjeve është edhe situata politike në Britani. Kryeministrja, Liz Truss deklaroi se është një luftëtare dhe nuk heq dorë, gjatë adresimit përpara Dhomës së Deputetëve.

Por, ajo po përballet me një presion në rritje për të dhënë dorëheqjen. Në fokus të tregjeve do të jenë edhe fitimet tremujore të korporatave në Europë dhe në SHBA.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.