Buxheti i shtetit “fryhet” nga të ardhurat shtesë – Tatim fitimi dhe TAP mbajnë peshën kryesore, TVSH zbret nga “piedestali”

Të ardhurat në buxhetin e shtetit për 5 muajt e parë të vitit kanë tejkaluar planifikimin, duke u regjistruar në 57.9 miliardë lekë ose 102 % të planit të të njëjtës periudhë. Krahasuar me një vit më parë të ardhurat janë rritur me 24.5 miliard lekë ose 10.5% më shumë.

Të ardhurat doganore (të ardhurat nga TVSH në import, akciza, taksa doganore dhe renta minerare) u realizuan në vlerën 84.1 miliardë lekë,  dhe 0.9 % më pak se plani i të ardhurave doganore për 5 mujorin e vitit 2023. Ndikim negativ në këtë drejtim ka pasur rënia  të ardhurave të TVSH-së në import, krahasuar një vit më parë me 1.9 % , ndërsa ardhurat nga akciza dhe renta minerare janë mbledhur më pak se parashikimi.  Taksat doganore kanë performuar pozitivisht.

Sa i takon të ardhurave tatimore,  për 5 mujorin 2023 u realizuan në masën 140.1 miliardë lekë, 19.1 miliardë ose 15.8% më shumë se 5 mujori i vitit të kaluar, si dhe 7.3% më shumë se plani. Tatimi mbi fitimin dhe tatimi mbi të ardhurat personale kanë shënuar rritjen me të lartë në krahasim me të njëjtën periudhë të një vitit më parë. Konkretisht nga tatimi mbi fitimin u arkëtuan 29.3 miliardë, ose 40.9% më shumë se 5 mujori 2022, nga Tatimi mbi të ardhurat personale janë arkëtuar 22.8 miliardë lekë, ose 24.8% më shumë se 5 mujori 2023.

Me 15% janë rritur edhe të ardhurat nga kontributet për sigurimet shoqërore dhe shëndetësore, të cilat u regjistruan në 55 miliardë lekë. TVSH e arkëtuar neto rezultoi në 18.6 miliardë lekë, duke njohur rritje me 12 për qind krahasimisht me një vit më parë, ndërsa taksat nacionale kanë pësuar rënie me 17.6 %. Prej disa muajsh TVSH-ja nuk ka qenë zëri kryesor  që ndikonte në rritjen e të ardhurave siç rezultoi vitin e kaluar,  kjo për shkak të rënies së inflacionit por edhe të konsumit.

Shpenzimet e përgjithshme publike, për periudhën pesë mujore të vitit 2023, arritën në rreth 221.7 miliard LEK me një realizim në masën 90 për qind të planit të periudhës,  ndërsa shpenzimet kapitale janë realizuar në masën 76.7 për qind të planit.

Elisabeta Dosku/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.