Energjia për furrat e bukës, sipas TVSH-së – Propozimi i ri: Tarifa e ulët, sipas faturës ku evidentohet vlera e reduktuar

Teksa prej disa javësh është rikthyer debati për çmimin e energjisë elektrike të furrave të bukës, që tregotojnë edhe prodhime brumi e pastiçerie, një alternativë e re për aplikimin e tarifës preferenciale për aktivitetin e prodhimit të bukës është duke u shqyrtuar.

Burime nga grupi i punës, thanë për TV SCAN se po synohet që diferencimi i çmimit preferencial prej 7.6 lekë/ kWh të bëhet përmes faturave të tregtimit të bukës, ku evidentohet TVSH-ja e reduktuar që subjektet paguajnë.

Kjo pasi, aktualisht TVSH e bukës është e reduktuar në masën 8%, ndërkohë që për produktet e tjerë të brumit dhe pastiçerisë aplikohet TVSH normale, në masën 20%.  Të njëjtët burime thanë se instalimi idy matësve, sipas aktivitetit që ushtrohet nga këto subjekte është i vështirë, duke qenë se prekja apo përgatitja e brumit kryhet në të njëjtat pajisje.

Ndërkaq, Shoqata e Bukës, Pastiçerisë dhe Brumrave ka parashtruar këreksat e saj për zgjidhjen e kësaj situate.  Referuar propozimeve, Shoqata kërkon që furrat që prodhojnë bukë dhe prodhime brumi, të kenë tarifimin alternativ 9.5 lekë/ kWh ose të studiohet me grup të përbashkët.

Ndërkohë që, prodhimi dhe shitja e pastiçerisë dhe brumërave ku nuk ka prodhim buke, të jetë me tarifimin normal prej 14 lekë/kWh. Aktualisht palët janë në bisedime, por më herët është thënë se faturimit me çmime normale biznesi mund të ndikojë në rritjen e çmimit të bukës.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.