Çmimet e shtëpive në eurozonë ulen edhe më shumë – Paralajmërimi i BQE pas rritjes së normave të interesit

Çmimet e shtëpive në eurozonë mund të shkojnë drejt një rënieje të çrregullt pasi normat e larta të interesave i bëjnë blerjet të papërballueshme për familjet dhe jo tërheqëse për investitorët. Deklarata u bë nga Banka Qendrore Europiane.

Ky ishte një nga disa rreziqe të shënuara në raportin për Rishikimin e Stabilitetit Financiar të BQE-së së bashku me kostot më të larta të huamarrjes dhe rritjen më të ngadaltë që dëmton kompanitë dhe familjet dhe, nga ana tjetër, duke hedhur një hije mbi huadhënësit tradicionalë dhe bankat në hije.

BQE ka rritur normat e interesit nga nivelet më të ulëta rekord që nga korriku, në një përpjekje për të luftuar inflacionin dhe duket se do të vazhdojë ta bëjë këtë në muajt e ardhshëm.

Por ndikimi i rritjes më të madhe në dekada sapo ka filluar të ndihet nga tregu i pronave, i cili ka lulëzuar gjatë një dekade kreditimi të lehtë.

Sipas BQE – së duke parë përpara, një rënie e çmimeve mund të bëhet e çrregullt pasi rritja e normave të interesit për kreditë e reja hipotekore komprometon gjithnjë e më shumë përballueshmërinë dhe rrit barrën e interesit për huatë ekzistuese, veçanërisht në vendet ku mbizotërojnë kreditë me norma të ndryshueshme.

Në  raport nuk renditeshin vende të caktuara, por të dhënat e BQE-së tregojnë se Portugalia, Spanja dhe vendet Baltike janë ndër ato ku përqindja e kredive me një normë të ndryshueshme është më e larta.

BQE paralajmëroi gjithashtu se rajonet ku investitorët institucionalë janë pozicionuar mirë në tregun e pasurive të paluajtshme rezidenciale mund të marrin një goditje më të madhe nëse kapitali tërhiqet.

Këtu përfshihet Berlini, pjesë të Gjermanisë perëndimore dhe disa kryeqytete si Parisi, Madridi, Lisbona dhe Dublini.

BQE tha gjithashtu se familjet po përfitonin nga një treg i fortë pune, që do të thotë se më pak njerëz kishin të ngjarë të ndalonin së paguari kredinë e tyre për shkak të papunësisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.