Crypto.com do të shkurtojë 20% të vendeve të punës ndërsa industria vijon të pëballet me sfida pas rënies së FTX!

Crypto.com tha të Premten se do të zvogëlonte rreth 20% të fuqisë së saj punëtore, pasi shkëmbimet e kriptomonedhave po përballen me sfida në mbarë industrinë e shkaktuar nga kolapsi i FTX vitin e kaluar.

Njoftimi i kompanisë me bazë në Singapor vjen mes shqetësimeve për rezervat dhe aftësinë paguese në të gjithë sektorin, dhe vetëm disa ditë pasi shkëmbimet rivale Coinbase Global Inc (COIN.O) dhe Huobi njoftuan planet e tyre për të pushuar nga puna rreth 20% të stafit të tyre.

Një burim i tha Reuters javën e kaluar se Genesis, gjithashtu, kishte shkurtuar vendet e punës, duke barazuar me 30% të forcës së saj punëtore. Pushimet nga puna në Crypto.com do të ishin të dytat në rreth gjashtë muaj, pasi reduktoi vendet e punës në korrik të vitit të kaluar për të përballuar rënien makroekonomike mes rritjes së normave të interesit.

Kolapsi i fundit i FTX “dëmtoi ndjeshëm besimin në industri”, tha në një deklaratë shefi ekzekutiv i Crypto.com, Kris Marszalek.

“Për këtë arsye, ndërsa ne vazhdojmë të fokusohemi në menaxhimin e kujdesshëm financiar, morëm vendimin e vështirë por të nevojshëm për të bërë reduktime shtesë në mënyrë që të pozicionojmë kompaninë për sukses afatgjatë”.

Rënia e FTX e Sam Bankman-Fried ishte më e madhja në vargun e dështimeve të mëdha të lidhura me kriptot në vitin 2022. Ai shkaktoi një shkatërrim të kriptomonedhës dhe ka lënë rreth 1 milion kreditorë të përballen me humbje prej miliarda dollarësh.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.