Depozitat, remitancat, eksportet, kë po penalizon mbiçmimi i lekut? – Zhvlerësimi i euros, në nivele shqetësuese. Pritet të thellohet nga zgjedhjet e turizmi
Edhe këtë javë, Leku ka vijuar tendencën e fortë mbiçmuese ndaj monedhës së përbashkët evropiane, duke u parë me shqetësim nga aktorë të ndryshëm, në një kohë që fenomeni pritet të vijojë të thellohet për shkak të flukseve shumë të larta valutore që hyjnë në tregun tonë në periudhat zgjedhore, por edhe prej afrimit të sezonit turistik. Të larta priten të mbeten edhe prurjet nga tregu i ndërtimit, i cili kontribuon në massë të konsiderueshme në volumin e valutës që qarkullon në vend. Situata shihet prej kohësh me shumë shqetësim nga bizneset e importit, por efektet negative të një euro kaq të dobët në tregun e bredshëm po shtrihen edhe në segmente te tjerë të ekonomisë.
Një nënçmim kaq të fortë të euros nuk mund të mos e ndjejë së pari sektori financiar, i cili një pjesë të mirë të aktiveve dhe të pasiveve i ka në monedhën e përbashkët evropiane.
Nga ana tjetër, një pjesë e mirë e depozitave bankare të qytetarëve e bizneseve janë në monedhën e përbashkët evropiane. Vetëm gjatë vitit 2022 depozitat në valutë kanë shfaqur përmirësim të normave të rritjes në 17.3%, duke bërë që në total, ato të jenë më shumë në vlerë se në monedhën lekë. Çdo nënçmim i mëtejshëm i euro zhvleftëson më tej këto depozita, të cilat në total janë mbi 6 miliardë euro.
Ndërkohë që edhe më i mprehtë bëhet zhvleftësimi i remitancave prej nënçmimit të euros, duke qenë se ato janë mjet jetese për një pjesë të madhe familjesh me të ardhura të kufizuara.
Ndërkohë që humbësit e mëdhenj, ata që kanë ngritur edhe zërin janë eksportuesit. Sipas vlerësimeve të vetë atyre, sektori i eksporteve humbi 225 milionë euro nga zhvleftësimi i monedhës evropiane në tregun shqiptar. Nënçmimi i euros është kthyer në një sfidë serioze për ta, në një kohë që ky zhvleftësim është shoqëruar me rritje të kostove të punës e të prodhimit.
Lorenc Rabeta/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.