Sfidat financiare të kryebashkiakëve të rinj – Çfarë pritet të ndryshojë në taksa dhe kontrollin mbi territorin?

Ndërsa na ndajnë edhe pak ditë nga zgjedhjet vendore, kryebashkiakët e rinj pritet të përballen me sfida të konsiderueshme ekonomiko – financiare në vitet e ardhshme. Procesi i decentralizimit dhe autonomisë financiare ende has problematika duke i bërë bashkitë të pafuqishme për të shfrytëzuar potencialin e territorit që administrojnë por edhe për të ofruar shërbime më të mira për qytetarët.

Si e tillë, qeveria ka miratuar Strategjinë Ndërsektoriale  për Decentralizimin  dhe  Qeverisjen  Vendore  2023–2030, dhe planin e veprimit deri në vitin 2025, e cila është botuar në Fletoren Zyrtare dhe adreson sfidat dhe ndryshimet që duhen ndërmarrë për të fuqizuar pushtetin vendor.

Konkretisht, sipas dokumentit,  “Autonomia financiare dhe pamjaftueshmëria e burimeve  financiare  për  bashkitë  në  ushtrimin  e plotë  dhe  me  efektivitet  të  funksioneve  të  tyre  ka  nevojë  për  forcim  të  mëtejshëm. Sfidë mbetet shtimi i  taksave  të  ndara  në  favor  të  qeverisjes  vendore, veçanërisht  rentës  minerare  dhe  tatimit  mbi  të ardhurat  personale,  si  dhe  sigurimi  i  mbështetjes për krijimin e kadastrës fiskale”.

Po ashtu, vihet në dukje mungesa e standardeve minimale në ofrimin e shërbimeve  vendore  nga  bashkitë,  për  të  cilën theksohet se  nevojitet  një  standard  i  mirëpërcaktuar  me  qëllim  rritjen e ofrimit të shërbimeve te qytetarët. Mungesa   e   qëndrueshmërisë   së   burimeve njerëzore  në  nivel  vendor, është një tjetër shqetësim,  për  të  cilin  kërkohet adresim   duke   rishikuar   nivelin   e   pagave   dhe incentivuar burimet njerëzore, me qëllim sigurimin e   një   administrate   të   aftë   dhe   të   mirëpaguar, veçanërisht   në   bashkitë   me   numër   të   vogël banorësh.

Dokumenti vë ne dukje, se dixhitalizimi  dhe  sfidat  e  shoqëruara  me  këtë proces   të   lidhura   me   ofrimin   e   shërbimeve  administrative apo edhe të aspekteve të tjera të një qeverisje   vendore   të   hapur   dhe   transparente përbëjnë  një  sfidë  aktuale. Në strategji evidentohet se “Bashkitë  nuk  kanë  shfrytëzuar  potencialin  e tyre  të  territorit  lidhur  me  asetet  dhe  burimet natyrore,  e  cila  vështirësohet  edhe  nga  procesi  i ngadaltë i transferimit dhe i regjistrimit të pronave.

Gjithashtu,  një  numër  i  kufizuar  bashkish  kanë përdorur   incentivat   ekzistuese   për   marrëveshje ndërbashkiake  me  qëllim  rritjen  e  ekonomive  të  shkallës”. Një tjetër sfidë kjo, që kërkon adresim të menjëhershëm. Ndërkohë që rekomandohet edhe rritja e përfaqësimit gjithëpërfshirës dhe forcimi  i  rolit  të  Këshillit Bashkiak    për    mbikëqyrjen    dhe    kontrollin    e veprimtarisë   së   ekzekutivit, qartësimit të kompetencave të administratorëve   dhe   rolit   të njësive  administrative, si  dhe  e strukturave komunitare.

Elisabeta Dosku/ SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.