Diferenca në deklarime, “gropa” në buxhet 16.8 mld lekë – KLSH, auditim Tatimeve në Tiranë: Nuk ka saktësuar vlerat e deklaruara në dogana   

Rreth 16.8 mld lekë përllogaritet shuma e të ardhurave të munguara në buxhetin e shtetit si pasojë e diferencave në vlerat e eksporteve të deklaruara në tatime dhe atyre të deklaruara në dogana. Kjo shifër i përket periudhës 2018 – 2020, ndërsa bëhet me dije nga një auditim i Kontrollit të Lartë të Shtetit, në Drejtorinë rajonale Tatimore të Tiranës, që është publikuar vetëm pak ditë më parë.

Sipas KLSH, nga auditimi u konstatua se, DRT Tiranë nuk ka përmbushur detyrimin për saktësimin nëpërmjet kontrollit tatimor apo vlerësimit nga zyra për tatimpaguesit me diferenca të pajustifikuara në vlerën e eksporteve të deklaruar në tatime dhe të deklaruar në doganë, për periudhën e sipërcituar, teksa këto veprime janë në kundërshtim me përcaktimet ligjore në fuqi. Si pasojë e vlerave më të ulta të deklaruara në tatime, nga subjektet janë shmangur detyrimet për tatimin mbi fitimin dhe TVSH-në, që duhet të paguajnë këto kompani.

Ndërkaq, sipas Kontrollit të Lartë të Shtetit, Drejtoria rajonale Tatimore Tiranë duhet të marrë masat e duhura administrative konform legjislacionit tatimor për diferencat e pajustifikuara, për vlerësimin e të ardhurave tatimore të munguara në zërat e Tatimit mbi Fitimin dhe TVSH-së në shumën prej 16.8 mld lekë, duke kryer vlerësimet dhe rivlerësimet përkatëse.

Po ashtu, kërkohet që t’i bëhen propozimet përkatëse Sektorit të Kontrollit Operacional në DRT Tiranë për kryerjen e kontrolleve të thelluara në vend ose vizitave fiskale për tatimpaguesit me risk të lartë apo pamundësi vlerësimi nga zyra, me qëllim arkëtimin e të ardhurave të munguara në Buxhetin e Shtetit.

Ola Mitre/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.