Dobësimi i dollarit mbështet metalet e çmuara – Ari ngjitet në 2,075 USD, prek nivelin më të lartë në 3 javë
Ari po qëndron në rritje edhe në sesionin e sotëm dhe po tregtohet në nivelin më të lartë në 3 javët e fundit, për shkak të dobësimi të dollarit amerikan. Gjithashtu, investitorët po presin edhe të dhënat mbi shpenzimet e konsumit personal në SHBA, që do të publikohen në vonë gjatë ditës së sotme dhe mund të japin një panoramë më të qartë mbi rrugën që do të ndjekë Rezerva Federale. Kontrata “spot” e arit po tregtohet në rreth 2,065 dollarë për onz, ndërsa kontrata “futures” po tregtohet në rreth 2,075 dollarë për onz.
Në këtë mënyrë, metali i verdhë po tregtohet në nivelin më të lartë që nga 4 dhjetori, ndërsa gjatë kësaj jave pritet të realizojë fitime prej 1.8%. Tashmë tregtarët po vlerësojnë 83% shanse për një ulje të normës bazë në SHBA deri në mars të vitit të ardhshëm. Zyrtarët e Fed kanë kundërshtuar idenë e uljes së shpejtë të normave të interesit vitin e ardhshëm, por këto vërejtje kanë ndryshuar shumë pak bindjen e investitorëve.
Indeksi i çmimeve të shpenzimeve të konsumit personal për nëntorin që do të publikohet ditën e sotme, mund të japë më shumë qartësi mbi politikën monetare të Rezervës Federale. Ndër metalet e tjera, argjendi po tregtohet në rreth 24.7 dollarë për onz, ndërsa platini po tregtohet në rreth 975 dollarë për onz. Tregu i metaleve të çmuara pritet të realizojë fitime për të dytën javë me radhë, në mbyllje të sesionit të sotëm.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.