Dollari e nis javën në rënie – Heqja e karantinës në Kinë rrit oreksin për asete me risk

Dollari amerikan po qëndron në rënie të lehtë në sesionin e sotëm, pasi investitorët janë drejtuar te asetet me risk, për shkak se qeveria kineze deklaroi se do të heqë karantinën për turistët e huaj, një hap i madh drejt rihapjes së kufijve. Megjithatë, volumi i shkëmbimeve tregtare është i ulët për shkak të festave të fundvitit.

Duke filluar nga 8 janari, Kina nuk do të kërkojë karantinë për udhëtarët e huaj, pavarësisht rritjes së infektimeve me Covid-19. Ndërkohë, euro po qëndron në rritje të lehtë dhe tregtohet e qëndrueshme në mbi 1.06 dollarë, ndërsa paundi po tregtohet në mbi 1.2 dollarë.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare, po qëndron në rreth 104. Të dhënat e publikuara javën e kaluar në SHBA treguan se shpenzimet konsumatore u rritën gjatë nëntorit, ndërkohë që inflacioni po ftohet. Në tregun e kriptomonedhave, huadhënësi Vauld ka refuzuar blerjen e mundshme nga rivali Nexo. Bitcoin po tregtohet i qëndrueshëm në mbi 16,800, ndërsa ethereum po tregtohet në mbi 1220 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.