Dollari, humbje për të dytin muaj me radhë – Investitorët presin takimet e bankave qendrore javën e ardhshme

Euro po këmbehet pranë 1.1 dollarëve edhe në sesionin e fundit të kësaj jave, ndërsa investitorët po presin takimet e bankave qendrore më të mëdha të botës, që zhvillohen javën e ardhshme.

Ndërkohë, dollari amerikan pritet të publikojë humbje për të dytin muaj me radhë, gjatë prillit, sepse Rezerva Federale pritet që shumë shpejt t’i janë fund ciklit të rritjes së interesave. Në Azi, fokusi i investitorëve ishte te takimi i Bankës së Japonisë, ku guvernatori i ri, Kazuo Ueda, njoftoi se do të vijojë me politikën monetare ultra-lehtësuese.

Indeksi që mat ecurinë e dollarit amerikan përballë shportës me 6 monedhat kryesore ndërkombëtare po qëndron në rreth 101.4, ndërsa gjatë muajit prill ka humbur rreth 1% të vlerës, pas rënies me 2.3% në mars.

Të dhënat e publikuara në Shtetet e Bashkuara të enjten, treguan se ekonomia më e madhe në botë u rrit me 1.1% në tremujorin e parë të vitit, nga 2.6% që u zgjerua në tremujorin e fundit të vitit 2023. Në tregun e kriptomonedhave, bitcoin po tregtohet në rreth 29,500 dollarë, ndërsa ethereum po tregtohet në rreth 1920 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.