Nafta publikon humbje për të dytën javë radhazi – Ndikohet nga ngadalësimi i ekonomisë amerikane dhe rritja e prodhimit

Nafta po qëndron në rritje të lehtë në sesionin e sotëm, por pritet të publikojë humbje për të dytën javë me radhë, për shkak të të dhënave zhgënjyese në Shtetet e Bashkuara, ekonomia më e madhe konsumatore në botë. Gjithashtu, edhe paqartësitë në lidhje me politikat monetare të bankave qendrore kanë ushtruar presion mbi çmimet.

Nafta Brent e Londrës po tregtohet në rreth 78 dollarë për fuçi, ndërsa nafta Bruto amerikane po tregtohet në rreth 75 dollarë për fuçi. Gjatë kësaj jave, të dyja kontratat kanë rënë me rreth 3.8%, ndërsa në dy javët e fundit kanë humbur mbi 9% të vlerës.

Të dhënat e publikuara në SHBA treguan se, ekonomia më e madhe në botë u ngadalësua gjatë tremujorit të parë të këtij viti, ndërsa aplikimet për përfitimin e asistencës së papunësisë ranë lehtë, gjatë javës që u mbyll më 22 prill.

Investitorët janë të shqetësuar edhe për rritjen e mëtejshme të interesave nga bankat qendrore në Europë, SHBA dhe Britani, që mund të ngadalësojnë më shumë kërkesën për naftë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.