Dollari, në nivelin më të lartë në 1 javë – FED mund të bëjë një pushim disa mujor me rritjen e interesave
Dollari amerikan po tregtohet i qëndrueshëm në sesionin e sotëm, pasi disa të dhëna në SHBA konfirmuan ngadalësimin e ekonomisë më të madhe në botë. Në këtë mënyrë janë rritur mundësitë që Rezerva Federale të bëjë një pushim disa mujor me rritjen e normave të interesit. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102, niveli më i lartë në 1 javë.
Gjatë kësaj jave, ndërkohë, ky indeks është rritur me rreth 0.7%. Referuar të dhënave në SHBA, numri i amerikanëve që aplikuan për përfitimin e asistencës së papunësisë u rrit në nivelin më të lartë në 1 vit e gjysëm, që sugjeron se tregu i punës po ngadalësohet. Euro po këmbehet në mbi 1.09 në raport me dollarin amerikan, ndërsa paundi britanik ka rënë drejt 1.25 dollarëve dhe humbjet më të mëdha i realizoi në sesionin e kaluar, pasi Banka e Anglisë rriti normën bazë të interesit me 25 pikë bazë, në linjë edhe me parashikimet e analistëve.
Tashmë, norma bazë e interesit në Mbretërinë e Bashkuar është rritur në 4.5%. Në tregun e kriptomonedhave, bitcoin po tregtohet në rreth 26,300 dollarë, ndërsa ethereum po tregtohet në rreth 1760 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.