Bursat europiane zgjerojnë fitimet – Banka e Anglisë rrit normën bazë të interesit në 4.5%
Tregjet europiane janë hapur në rritje edhe në sesionin e fundi të kësaj jave, ndërsa investitorët janë të fokusuar te fitimet tremujore të korporatave. Indeksi pan-Europian Stoxx 600 e ka nisur ditën në rritje me 0.5%, me sektorin bankar që kryeson fitimet, në rritje me rreth 1%.
Referuar zhvillimeve të tjera, ekonomia e Mbretërisë së Bashkuar u rrit me 0.1% në tremujorin e parë të këtij viti, në linjë edhe me parashikimet e analistëve. Edhe ekonomia e Eurozonës u rrit po me 0.1% në tre muajt e parë të këtij viti. Njëkohësisht, Banka e Anglisë vendosi të rrisë normën bazë të interesit në 4.5%, në linjë me parashikimet e analistëve, në përpjekje për të ulur inflacionin që po qëndron në rreth 10%.
Gjithashtu, banka qendrore tha se nuk pret që ekonomia e Mbretërisë së Bashkuar të bjerë në recesion, gjatë këtij viti. Në fokus të tregjeve janë edhe bisedimet në Shtetet e Bashkuara për të rritur tavanin e borxhit. Kongresi po përpiqet të gjejë një kompromis mbi limitin e borxhit, që i referohet maksimumit të shumës së parave që të dyja dhomat e Kongresit i lejojnë qeverisë të marrë hua.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.