Nafta zbret drejt 75 USD për fuçi – Në fokus të tregjeve, bisedimet për tavanin e borxhit në SHBA

Nafta po qëndron në rënie edhe në sesionin e fundit të kësaj jave, për shkak të paqartësive në lidhje me rritjen e tavanit të borxhit në SHBA. Nafta Brent e Londrës po tregtohet në rreth 75 dollarë për fuçi, ndërsa nafta bruto amerikane po tregtohet në rreth 70 dollarë për fuçi. Gjatë kësaj jave të dyja kontratat kanë ndryshuar minimalisht, ndërsa në tre javët e kaluara kanë pasur një tendencë në rënie.

Gjithsesi, lajmet se Shtëpia e Bardhë mund të blerë naftë me një çmim prej 70 dollarë për fuçi, për të mbushur rezervat strategjike kanë ofruar një mbështetje për çmimet. Në fokus të tregjeve janë edhe bisedimet në Kongres për të rritur tavanin e borxhit prej 31.4 trilionë dollarë.

Raundi i dytë i bisedimeve mes presidentit amerikan, Joe Biden dhe liderëve të kongresit do të zhvillohet ditën e sotme. Palët kanë edhe disa javë në dispozicion për të arritur një marrëveshje, në të kundërt ekonomia më e madhe në botë mund të përballet me një falimentim të paprecedentë në pagesat e borxhit. Ndërkohë, Organizata e Vendeve Eksportuese të Naftës, parashikon në raportin mujor se kërkesa do të rritet gjatë vitit 2023, falë rimëkëmbjes së ekonomisë kineze.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.