Kontinenti në ndryshim – Popullsia e BE-së po zvogëlohet, zbulojnë shifra të reja

Raporti i Eurostat-it për Demografinë e Evropës dokumenton faktorë të ndryshëm që ndikojnë në jetën e dhjetëra miliona njerëzve. Popullsia e Bashkimit Evropian është ulur me më shumë se gjysmë milioni krahasuar me vitin 2020, sipas statistikave më të fundit demografike të publikuara nga Eurostat.

Raporti zbuloi efektin negativ të viktimave të COVID-19 në popullsinë e BE-së, duke ndërprerë rritjen vjetore të vërejtur deri në vitin 2020.

Pavarësisht se 17 vende anëtare të BE-së treguan një rritje absolute të popullsisë, shtatë vende ndoqën trendin e kundërt, duke përfshirë ulje të ndjeshme në Itali, Poloni, Greqi dhe Kroaci.

Statistikat vjetore demografike, të prodhuara nga statistikat zyrtare të Evropës synojnë të shikojnë se si po zhvillohet popullsia në rajon sipas një numri metrikash kryesore.

Këtu janë disa nga pikat kryesore nga raporti i fundit:

Popullsia e BE-së në rënie

Popullsia e BE-së më 1 janar 2022 ishte 446.7 milionë – një rënie e lehtë krahasuar me të njëjtën ditë të vitit 2021.

Edhe pse popullsia e përgjithshme është rritur me 4% krahasuar me vitin 2001, popullsia ra për të dytin vit radhazi.

Ka pasur 585,000 njerëz më pak në janar 2022 krahasuar me ditën e parë të 2020 në Bashkimin Evropian.

Popullsia e BE-së vazhdoi të rritet çdo vit deri në janar 2020 dhe më pas filloi të ndiqte trendin negativ, i cili i atribuohet viktimave të shkaktuara nga pandemia COVID-19.

BE po plaket shpejt

Shifrat e fundit tregojnë se mbi një e pesta e banorëve të BE-së tani janë të moshës 65 vjeç e lart.

Me akses në objekte më të mira të kujdesit shëndetësor, pjesa e atyre të moshës 80 vjeç e lart pothuajse u dyfishua në vitin 2022 krahasuar me vitin 2002.

Nga ana tjetër, u pa gjithashtu një rënie në popullsinë nën moshën 20 vjeç, duke kontribuar në shifrat e përgjithshme të plakjes.

Kjo do të thotë një rritje në moshën mesatare të njerëzve që banojnë në BE.

Mosha mesatare në BE në vitin 2022 ishte 44.4 vjeç, një rritje prej gati gjashtë vjetësh krahasuar me shifrat e 20 viteve më parë.

Ndërsa Italia kishte moshën mesatare më të lartë në mesin e vendeve anëtare me 48 vjeç, Qiproja qëndronte në fund me 38.3 vjet.

Gratë jetojnë më gjatë në BE

Gratë në BE jetojnë më gjatë se burrat në BE, bazuar në shifrat më të fundit të jetëgjatësisë.

Megjithëse jetëgjatësia e përgjithshme ra me 1.2 vjet midis 2019 dhe 2021, shifrat tregojnë se gratë jetojnë 5.7 vjet më shumë se burrat.

Jetëgjatësia në lindje për gratë ishte 82.9 për gratë në 2021 krahasuar me 77.2 për burrat. Të gjitha vendet anëtare të BE-së ndoqën të njëjtin trend.

Jetëgjatësia mesatare e përgjithshme është rritur nga 77.6 vjet në 2002 në 80.1 në 2021 me faktorë si reduktimi i vdekshmërisë foshnjore, rritja e standardeve të jetesës, përmirësimi i stilit të jetesës, arsimimi më i mirë dhe përparimet në kujdesin shëndetësor dhe mjekësinë që vonojnë vdekjet e parakohshme.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.