Dollari, në nivelin më të ulët në 2 muaj – Rezerva Federale mund t’i japë fund ciklit të rritjes së interesave

Dollari amerikan po qëndron në nivelin më të ulët në dy muajt e fundit, në sesionin e sotëm pasi të dhënat e dobëta mbi ekonominë amerikane kanë shtuar mundësitë se Rezerva Federale mund të jetë drejt fundit të ciklit të rritjes së interesave.

Ndërkohë, banka qendrore e Zelandës së Re rriti normën bazë të interesit me 50 pikë bazë, në totalin e 5.25%, niveli më i lartë në 14 vitet e fundit. Të dhënat e publikuara në SHBA treguan se, krijimi i vendeve të reja të punës ra në nivelin më të ulët në 2 vitet e fundit, gjatë shkurtit. Hapja e vendeve të reja të punës, që është një matës i kërkesës për punë, ra me 632 mijë njësi në totalin e 9.9 milionë.

Ekonomistët e anketuar nga Reuters parashikonin 10.4 milionë vende të reja pune. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 101.5, niveli më i ulët në 2 muajt e fundit. Në anën, euro po qëndron në nivelin më të lartë në 2 muaj përballë dollarit, në rreth 1.095. Në tregun e kriptomonedhave, bitcoin po qëndron në rreth 28,500 dollarë, ndërsa ethereum po tregtohet në rreth 1910 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.