Britanikët dhe kartat e besnikërisë – Dyqanet shpërblejnë klientët e tyre me ulje çmimesh

Më shumë se gjysma e britanikëve u ndjenë të inkurajuar për të blerë produkte për shkak të zbritjeve të ofruara përmes kartave të besnikërisë së dyqaneve, sipas një sondazhi. Të dhënat publikohen në një moment që blerësit po përballen me krizën e kostos së jetesës prej kohësh tashmë.

Kërkimi i konsumatorëve në Mbretërinë e Bashkuar për produkte me çmime të ulëta vazhdon. Kjo pasi inflacioni total mbi 10% në shkurt dhe të dhënat më të fundit nga kompania kërkimore Kantar tregojnë se çmimet e ushqimeve u rritën me një nivel rekord prej 17.5% muajin e kaluar.

Sipas sondazhit, 54% e britanikëve thanë se zbritjet e kartave të besnikërisë kishin më shumë gjasa t’i inkurajonin ata të blinin një produkt. Më shumë se një e treta e tyre zgjodhën gjithashtu një “zbritje çmimi të veçantë” për mbajtësit e kartave të besnikërisë si një promovim që do të ndikojë se ku do të blejnë.

Anketa më e fundit tregon se gjatë një periudhe me inflacion të lartë, blerësit janë në kërkim të mënyrave të ndryshme për të kursyer para dhe kursimet e kartave të besnikërisë janë një strategji ” fituese” pasi ato shpërblejnë si blerësit ashtu edhe shitësit me pakicë.

Sondazhi nuk kishte krahasime historike për të dhënat pasi vlerat nuk ishin uniforme mes shitësve me pakicë në vitet e fundit. Shitjet e ushqimeve u rritën 11.5% në katër javët deri më 25 mars pas një rritje prej 11.1% në shkurt. Sipas analistëve supermarketet duhet të marrin një nxitje nga fundjava e ardhshme e Pashkëve.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.