Dollari, në nivelin më të ulët në 4 muaj – FED sinjalizon fundin e ciklit shtrëngues të politikave monetare

Dollari amerikan po qëndron në nivelin më të ulët në 4 muajt e fundit, përballë shportës me 6 monedhat kryesore ndërkombëtare, për shkak se Rezerva Federale sinjalizoi fundit e ciklit shtrëngues, ndërsa njoftoi lehtësimin e kostove të huamarrjes në vitin 2024. Në një ditë të ngarkuar me vendime mbi politikat monetare në Europë, korona norvegjeze u forcua pasi Norges Bank e rriti me 25 pikë bazë, normën e interesit.

Në anën tjetër, Banka Qendrore Europiane, Banka e Anglisë dhe Banka Kombëtare e Zvicrës nuk i ndryshuan politikat monetare, sikurse pritej gjerësisht nga analistët. Presidenti i Rezervës Federale, Jerome Powell, tha pas takimin të Komitetit Federal të Tregut të Hapur se shtrëngimi historik i politikës monetare ka të ngjarë të ketë përfunduar, ndërsa diskutimet janë fokusuar në uljen e kostove të huamarrjes.

Politikëbërësit ishin pothuajse unanim në parashikimet e tyre, se kostot e huamarrjes do të bien në vitin 2024. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare ka rënë me rreth 0.3%, në rreth 102.4, niveli më i ulët që nga mesi i gushtit.

Tregjet tashmë vlerësojnë mbi 80% shanse për një ulje të interesave në mars të vitit të ardhshëm, krahasuar me 40% vetëm një ditë më parë. Ndërkohë, Banka Qendrore Europiane rishikoi edhe parashikimet ekonomike për Eurozonën.

Tashmë pret që blloku të rritet me 0.6% në vitin 2023 dhe me 0.8% vitin e ardhshëm. Ndërsa inflacioni parashikohet të jetë mesatarisht 5.4% për këtë vit, 2.7% në 2024 dhe 2.1% në 2025. Banka Qendrore Europiane vendosi ta mbajë të pandryshuar normën bazë të interesit për të dytin muaj me radhë, në një rekord prej 4%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.