Dollari pranë nivelit më të ulët në 4 javë – FED nuk ndryshon interesat, por sinjalizon 2 rritje deri në dhjetor

Dollari po qëndron në rënie edhe në sesionin e sotëm dhe po tregtohet pranë nivelit më të ulët në 4 javët e fundit, pasi Rezerva Federale nuk ndryshoi normat e interesit, sikurse pritej gjerësisht nga investitorët. Por, shefi i FED, Jerome Powell sinjalizoi edhe dy rritje të tjera të interesave më vonë gjatë këtij viti.

Indeksi që mat ecurinë e dollarit amerikan përballë shportës me 6 monedhat kryesore ndërkombëtare po qëndron në rreth 103, niveli më i ulët në 4 javët e fundit. Analistët parashikojnë se norma bazë e interesit do të rritet deri në 5.6% në fund të këtij viti, nga 5.1% që vlerësonin në mars. Ndërkohë, tregjet po presin edhe takimin e Bankës Qendrore Europiane, më vonë gjatë ditës së sotme, e cila pritet të rrisë normën e interesit edhe me 25 pikë bazë.

Gjithashtu, shefja e BQE, Christine Lagarde pritet të sinjalizojë se normat e interesit do të qëndrojnë të larta për një kohë të gjatë, pavarësisht shenjave të ngadalësimit të inflacionit pranë 6%, gjatë majit. Në tregun e kriptomonedhave, bitcoin ka rënë poshtë nivelit të rezistencës prej 25 mijë dollarë dhe po tregtohet në rreth 24,900 dollarë. Ethereum po tregtohet në rreth 1635 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.