FED rrëzon edhe naftën – Sinjalizon edhe dy rritje të tjera të interesave gjatë këtij viti

Nafta po tregtohet e qëndrueshme në sesionin e sotëm, pas humbjeve të realizuara një ditë më parë menjëherë pas presidenti i Rezervës Federale, Jerome Powell, sinjalizoi edhe dy rritje të tjera të interesave deri në dhjetor. Gjithashtu, edhe të dhënat zyrtare në SHBA treguan një rritje të ndjeshme të rezervave të naftës gjatë javës së kaluar. Nafta Brent e Londrës ra me rreth 1 dollar në sesionin e kaluar, ndërsa sot po tregtohet në rreth 73 dollarë për fuçi.

Nafta Bruto amerikane po tregtohet në rreth 68 dollarë për fuçi, ndërsa në sesionin e kaluar ra me 1.15 dollarë. Rezerva Federale nuk ndryshoi politikën e saj monetare, por sinjalizoi të tjera rritje në vijim, që do të thotë se kostoja e huamarrjes do të jetë më e shtrenjtë. Teorikisht, norma më të larta interesi e forcojnë dollarin, duke i bërë lëndët e para të denominuara në monedhën e gjelbër më të shtrenja për zotëruesit e monedhave të tjera.

Referuar të dhënave në SHBA, rezervat e naftës bruto u rritën me rreth 8 milionë fuçi, gjatë javës që u mbyll më 9 qershor. Analistët parashikonin një rënie me rreth 500 mijë fuçi. Ndërkohë, Agjencia Ndërkombëtare e Energjisë parashikon se kërkesa për naftë do të rritet me rreth 2.4 milionë fuçi në ditë, në totalin e 102.3 milionë fuçi në ditë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.