Macron kritikon BE për Inteligjencën Artificiale – Franca do të investojë 7 mld euro për zhvillimin kombëtar të Inteligjencës Artificiale

Presidenti francez Emmanuel Macron ka bërë të qartë qasjen e tij ndaj aktit të Inteligjencës Artificiale të miratuar një ditë më parë nga Parlamenti Europian. Gjatë një takimi me temë teknologjinë në Paris, Macron pohoi se investitorët institucionalë francezë përfshirë dhe kompanitë e sigurimit, janë impenjuar që të shpenzojnë 7 miliardë euro për të financuar një iniciativë kombëtare në mbështetje të inovacioneve teknologjike, të njohur me termin Tibi 2.

Ai gjithashtu paralajmëroi reduktime të tatimit mbi të ardhurat për ata që investojnë në startup. Macron më pas lavdëroi talentin francez në fushën e këkrimeve mbi inteligjencën artificiale, por kërkoi më shumë start up në sektor.

Ai theksoi se vendi është lider në Europën kontinentale, duke shtuar se britanikët janë vetëm pak më përpara, por kjo distancë nuk është e pamundur të rikuperohet. Macron gjithashtu pranoi se amerikanët dhe kinezët janë shumë më përpara.

Parlamenti Europian ka miratuar një ligj mbi inteligjencën artificiale i cili kufizon përdorimin e teknologjisë përfshirë dhe një ndalim total të monitorimit biometrik në kohë reale. Ligjvënësit duan që rregullat të kenë një impakt real tek kompanitë brenda vitit 2026, por më parë duhet të negociojnë me shtetet anëtare dhe kritikat e presidentit francez paralajmërojnë tensione me politikën kombëtare dhe atë të Bashkimit Europian.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.