Dollari “qetësohet”, pas dy ditësh në rritje – Investitorët preferojnë monedhën e gjelbër për shkak të Covid-19 në Kinë

Dollari amerikan po tregtohet i qëndrueshëm në sesionin e sotëm, pas dy ditësh me radhë në rritje. Investitorët kanë preferuar monedhën e gjelbër, që cilësohet si një parajsë e sigurtë në periudha trazirash. Rritja e infektimeve me Covid-19 në Kinë, ka rritur kërkesën e investitorëve për monedhën e gjelbër.

Autoritetet në Pekin paralajmëruan se kryeqyteti po përballet me valën më të ashpër të infektimeve që kur filloi pandemia. Monedha e përbashkët europiane, euro, po tregtohet në mbi 1.02 dollarë, ndërsa gjatë sesionit të kaluar humbi rreth 3.8% të vlerës.

Indeksi që mat ecurinë e dollarit amerikan përballë shportës me monedhat kryesore ndërkombëtare, po qëndron në rreth 107.7, ndërsa në sesionin e kaluar u rrit me rreth 1%.

Investitorët po presin të dhëna të tjera mbi ekonominë amerikane për të përcaktuar më saktë politikat monetare që do të ndjekë Rezerva Federale në SHBA. Në tregun e kriptomonedhave, huadhënësi Genesis ishte viktima e fundit nga kolapsi i platformës së këmbimit FTX. Bitcoin po tregtohet në rreth 15,700 dollarë, ndërsa ethereum po tregtohet në rreth 1090 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.