Dollari vijon tendencën në rritje – Sot pritet të votohet rritja e tavanit të borxhit në Dhomën e Përfaqësuesve

Dollari amerikan është forcuar edhe në sesionin e sotëm dhe po tregtohet në nivelin më të lartë në 8 javët e fundit, përballë shportës me 6 monedhat kryesore ndërkombëtare. Megjithatë, investitorët po tregohen të kujdesshëm, në pritje të votimit të projektligjit për rritjen e tavanit të borxhit në SHBA. Euro ka humbur rreth 0.5% të vlerës po ka zbritur sërish poshtë 1.07 dollarëve. Edhe paundi britanik po qëndron në rënie, duke zbritur poshtë nivelit të 1.24 përballë dollarit amerikan.

Në mbrëmjen e sotme, projektligji për rritjen e tavanit të borxhit në SHBA do të votohet në Dhomën e Përfaqësuesve, ndërsa përpara të hënës duhet të ketë kaluar edhe në Senat, në mënyrë që të kthehet në ligj.

Projektligji prej 99 faqesh do të pezullojë kufirin e borxhit deri më 1 janar të vitit 2025, duke i lejuar ligjvënësit të lënë mënjanë çështjen me rrezik politik deri pas zgjedhjeve presidenciale të nëntorit 2024. Ai gjithashtu do të kufizojë disa shpenzime qeveritare gjatë dy viteve të ardhshme.

Sekretarja amerikane e Thesarit, Janet Yellen tha të premten se qeveria do të falimentonte nëse Kongresi nuk rrit tavanin e borxhit deri më 5 qershor. Në tregun e kriptomoedhave, bitcoin ka rënë drejt nivelit të 27 mijë dollarëve, ndërsa ethereum po tregtohet në rreth 1870 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.