Dollari zgjeron humbjet edhe në nisje të javës – Tregjet presin inflacionin në SHBA dhe vendimin e FED mbi interesat

Dollari amerikan ka vijuar dobësimin edhe në fillim të kësaj  jave dhe po tregtohet në nivelin më të ulët në 5 muajt e fundit, për shkak të të dhënave pozitive mbi punësimin në SHBA dhe rihapjes së ekonomisë kineze. Këto zhvillime kanë rritur oreksin e investitorëve për asete me risk, duke u larguar nga dollari amerikan. Indeksi që mat ecurinë e monedhës së gjelbër përballë 6 monedhave kryesore ndërkombëtare po qëndron në rreth 104, niveli më i ulët që nga 28 qershori, ndërsa javën e kaluar ky indeks humbi rreth 1.4% të vlerës.

Referuar të dhënave në SHBA, ekonomia amerikane krijoi edhe 263 mijë vende të reja pune gjatë nëntorit, ndërsa analistët parashikonin 200 mijë vende të reja pune. Tashmë, tregjet do të presin edhe të dhënat mbi inflacionin në SHBA, që do të publikohen më 13 dhjetor, një ditë përpara se Rezerva Federale të marrë vendimin mbi normat e interesit. Banka Qendrore amerikane parashikohet të rrisë normën bazë të interesit me 50 pikë bazë.

Njëkohësisht, investitorët u larguan nga dollari amerikan, pasi qeveria kineze njoftoi të dielën lehtësimin e masave të Covid-19, por edhe rënie të numrit të infektimeve. Euro po tregtohet në rreth 1.0540 dollarë, ndërsa javën e kaluar u rrit me 1.3%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.