Dollari zgjeron humbjet – Investitorët presin të dhënat mbi inflacionin në SHBA
Dollari amerikan po qëndron në rënie të lehtë edhe në sesionin e sotëm, përballë monedhave kryesore ndërkombëtare, pasi investitorët po presin të dhënat mbi inflacionin në SHBA, që do të publikohen më vonë gjatë ditës së sotme.
Indeksi që mat ecurinë e monedhës së gjelbër po qëndron në rreth 102, shumë pranë nivelit më të ulët në 2 muajt e fundit. Analistët parashikojnë se inflacioni në SHBA do të jetë ngadalësuar në 5.2% gjatë marsit, nga 6% që ishte në shkurt, ndërsa inflacioni bazë pritet të jetë rritur lehtë në 5.6%.
Nëse parashikimet dalin të sakta, ekzistojnë 74% mundësi që Rezerva Federale të rrisë edhe me 25 pikë përqindje normën bazë të interesit në takimin e majit. Ndërkohë, kujdesi është i lartë, pasi të martën Fondi Monetar Ndërkombëtar, në raportin mbi stabilitetin financiar global, deklaroi se ekonomia globale do të ngadalësohet në një rritje prej rreth 3%, në terma afatmesëm, që do të jetë hapi më i ngadaltë i rritjes në 3 dekadat e fundit.
Në tregun e kriptomonedhave, bitcoin po tregtohet në rreth 30 mijë dollarë, pranë nivelit më të lartë në 10 muajt e fundit, ndërsa ethereum po tregtohet në rreth 1870 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.