“Domosdoshmëri politikat e zgjuara për kapitalin njerëzor!” – Shkollat profesionale të bashkëpunojnë me strukturat e turizmit
Dita-ditës për bizneset forca e punës po kthehet jetike për mbarëvajtjen e tyre. Kështu, thirrja e bizneseve është konsolidimi i duhur i hartimit të politikave të kapitalit njerëzor të sektorëve prioritar.
Nikolin Jaka shprehet: “Duhet të ndërgjegjësohemi për një sfidë, që qeveria shqiptare të hartojë politika të zgjuara për të ardhmen e vendit tonë. Në radhë të parë politika të zgjuara për kapitalin njerëzor dhe hartimin e politikave dhe sektorët prioritar të zhvillimit të ekonomisë pra kush janë potencialet reale për të performuar dhe për ta kthyer në vlerë të shtuar për sipërmarrjen private investimin në këto sektorë. Nëse nuk i kemi këto sektorë për sipërmarrjen private, atëherë do të jemi në retorikën 30-vjeçare.
Ndërkohë sipas Shoqatës së Bareve dhe Restoranteve turistike në Shqipëri, fuqia punëtore në këtë sektor është domosdoshmëri për sezonin turistik. Kujtim Dervishi nga Shoqata e Restoranteve dhe Bujtinave Turistike thotë se: “Ky panair duhet të ketë një vëmëndje, një rëndësi të veçantë edhe për vizitorët por edhe për zyrtarët për të krijuar mundësi dhe hapësira për të gjetur modalitete për punonjësit që mos të lëjnë Shqipërinë por t’i përkushtohen gjithë industrisë ekonomike të Shqipërisë. Sot ne kemi ardhur në emër të Shoqatës së Restoranteve dhe Bujtinave turistike shqiptare për të marrë kontakte. Do të takojmë një shkollë profesionale për të lidhur një marrëveshje me të për të krijuar mundësira, për të marrë stafe që dalin nga shkolla për t’i akomoduar në rrjetin e restoranteve dhe bujtinave shqiptare”.
Sipas Dervishit, shkollat profesionale duhet të bashkëpunojnë më tepër me strukturat e turizmit për të dhënë kontributin e tyre me gjeneratat e reja.
Diamila Leka/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.