Dy mënyrat për të rritur masën e pensionit – Ekspertja Nunaj: Të rishikohen koeficientët e vlerësimit të pagave, pension i 13-të për të moshuarit

Reformimi i skemës së pensioneve në vitin 2015 nuk e zgjidhi problematiken e deficitit të shkaktuar në buxhet. Kur kanë kaluar më shumë se 7 vite, ecuria e saj shihet me pikëpyetje ndërsa ekspertët parashtrojnë nevojën e ndërhyrjeve të reja me qëllim përmiresimin e skemës por njëkohësisht për të rritur masën e përftimit për pensionistët.

E ftuar në emisionin “Box to Box” Nunaj thotë se për të rritur masën e përfitimit për ata të cilët dalin rishtazi në pension, është e udhës që të ndërhyhet në dy shtylla kryesore, konkretisht në rishikimin e koeficientëve të vlerësimit si edhe në zbatimin e kolonës së dytë që janë pensionet private.

Ndërsa për ata të cilët janë aktualisht në skemë, ekspertja e ekonomisë thotë se duhet t’ju ofrohet pension i 13-të si edhe indeksimi vjetor të bëhet bazuar në normën e inflacionit për shportën e pensionistit.

Prej këtij muaji ka nisur të aplikohet edhe shtesa në masën 8.6 për qind. Çka do të thotë se bashkë me pensionin, të moshuarit do të përfitojnë edhe rritjen.

Ada Hazizolli / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.