Ekonomia e fortë mbështet dollarin – Monedha amerikane, fitime për të tretin muaj me radhë

Dollari po qëndron në rritje edhe në sesionin e sotëm dhe pritet të publikojë fitime për të tretin muaj me radhë, gjatë tetorit, pasi shifrat solide të rritjes ekonomike në SHBA sugjerojnë se normat e interesit do të mbeten të larta për më gjatë. Ndërkohë, jeni japonez po lufton me nivelin sensitiv prej 150, në raport me dollarin dhe investitorët po presin takimet e bankave qendrore javën e ardhshme.

Ekonomia amerikane u rrit me 4.9% në tremujorin e tretë të këtij viti, ritmi më i shpejtë në gati dy vjet, pasi pagat më të larta dhe një treg i mirë i punës ndihmuan në fuqizimin e shpenzimeve konsumatore.

Këto të dhëna kanë rritur mundësitë që Rezerva Federale të mbajë kushtet monetare kufizuese për më gjatë. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 106.5, niveli më i lartë në 3 javët e fundit.

Ndërkohë, Banka Qendrore Europiane i mbajti të pandryshuara normat e interesit në takimin e së enjtes, pas 10 rritjesh me radhë. Të dhënat e publikuara në fillim të javës treguan se aktiviteti i biznesit në Eurozonë mori një kthesë të papritur në territor negativ këtë muaj, duke shtuar mundësitë për një recesion në bllokun e monedhës së përbashkët.

Në fokus të tregjeve javën e ardhshme do të jenë takimet e Rezervës Federale, Bankës së Anglisë dhe Bankës së Japonisë. Ndaj autoriteteve në Japoni është shtuar presioni për të ndërhyrë në tregun monetar, pasi jeni është zhvlerësuar deri në 150 në raport me dollarin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.