Euro, e qëndrueshme poshtë 1.02 dolalrë – Tregjet po presin të dhënat në SHBA mbi punësimin për qershorin

Euro po tregtohet e qëndrueshme në sesionin e sotëm, pranë nivelit më të ulët në 20 vitet e fundit, dhe pritet të realizojë javën më të dobët në dy muajt e fundit. Investitorët po tregohen të kujdesshëm, në pritje të të dhënave mbi punësimin në SHBA, që publikohen më vonë gjatë ditës së sotme.

Euro ka humbur rreth 2% të vlerës, gjatë kësaj jave, për shkak të shqetësimeve mbi sigurinë energjetike dhe mundësive që ekonomia e Eurozonës të bjerë në recesion.

Në anën tjetër, indeksi që mat ecurinë e dollarit amerikan, përballë monedhave kryesore ndërkombëtare, po qëndron në mbi 107, nivelin më i lartë në dy dekadat e fundit. Analistët shprehen se, Europa është e ekspozuar ndaj rreziqeve të mëdha të lidhura me varësinë e madhe energjetike nga Rusia, rritjen e kostove të jetesës dhe rënien e shpenzimeve konsumatore.

Gjithashtu, investitorët janë të shqetësuar edhe për ngadalësimin e ekonomisë amerikane, e cila mund të ketë rënë në recesion gjatë periudhës prill-qershor.

Ndërkohë, paundi britanik ka pasur një javë relativisht të mirë, në rënie të lehtë me 0.3%, duke i rrezistuar kaosit politik në Mbretërinë e Bashkuar. Në tregun e kriptomonedhave, bitcoin ka tentuar rimëkëmbjen, ndërsa gjatë kësaj jave është rritur me rreth 15% dhe tregtohet pranë 22 mijë dollarëve. Ethereum po tregtohet në rreth 1240 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.