Euro ndal forcimin përballë dollarit – Inflacioni në Eurozonë rezulton më i ulët se parashikimet

Monedha europiane, euro është dobësuar ndjeshëm në sesionin e sotëm, për shkak se inflacioni në Eurozonë u ngadalësua më shumë se parashikimet e analistëve për nëntorin. Në anën tjetër, fitimet e dollarit amerikan janë kufizuar nga pritshmëritë se Rezerva Federale do të ulë normat e interesit në SHBA, gjatë gjysmës së parë të vitit 2024.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102.7, jo shumë larg nivelit më të ulët në 3 muajt e fundit. Ky indeks ka humbur rreth 3.7% të vlerës, gjatë nëntorit.

Sipas të dhënave të Eurostat, inflacioni në Eurozonë u ngadalësua në 2.4% me bazë vjetore për nëntorin, nga 2.9% që ishte në tetor.

Analistët e anketuar nga Reuters parashikonin një shifër prej 2.7%. Edhe inflacioni bazë, që vëzhgohet nga afër nga Banka Qendrore Evropiane dhe përjashton efektet e paqëndrueshme të energjisë, ushqimit, alkoolit dhe duhanit, gjithashtu ra më shumë se sa pritej, duke u ulur në 3.6% në nëntor, nga 4.2% që ishte në tetor. Investitorët po presin edhe komentet që do të bëjë të premten, presidenti i Rezervës Federale, Jerome Powell.

Një ditë më parë, guvernatori i Rezervës Federale, Christopher Waller, sinjalizoi se normat e interesit mund të ulen së shpejti, nëse inflacioni shfaq shenja të ngadalësimit. Ndër zhvillimet e tjera, pritshmëritë se Banka e Japonisë do ti japë fund normave negative të interesit e kanë mbështetur jenin, që është tërhequr nga niveli më i ulët në thuajse 1 vit, në raport me dollarin amerikan. Tashmë, investitorët i kanë ndryshuar pritshmëritë edhe në lidhje me Bankën Qendrore Europiane dhe presin që ulja e parë e interesave mund të vijë në muajin prill të vitit 2024.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.